यशस्वी भव!

माणसानं आयुष्यात यशस्वी बनण्यासाठी कोणत्या गोष्टी कराव्यात आणि कोणत्या टाळाव्यात ह्यासाठी माहितीजालावर अनेक संकेतस्थळ मार्गदर्शन करत असतात. अशीच एक लिंक वाचनात आली आणि त्यावर आधारित ही पोस्ट! ह्यातील बरेचसे मुद्दे ह्या लिंकवर आधारित आहेत पण उदाहरणं मात्र मी माझी देण्याचा प्रयत्न केला आहे. 

आता इथं एक स्पष्टीकरण आवश्यक आहे. यशस्वी भव म्हणजे प्रत्येकानं आपापल्या क्षमतेचा महत्तम वापर करुन जीवनात शक्य तितकं उच्चत्तम स्थान गाठणं! दुनियेच्या नजरेत तुम्ही कदाचित सर्वसामान्य असू शकाल पण जर तुम्ही उपलब्ध परिस्थितीत आणि तुमच्या मर्यादेत शक्य तितकी ध्येये साध्य केलीत तर तुम्ही यशस्वी झालात!  

1. आरोग्यपूर्ण जीवनसरणी. 
• मदिराप्राशन करू नका असं मी जरी म्हणू इच्छित असलो तरी म्हणणार नाही कारण हल्ली बरेच यशस्वी लोक मदिराप्राशन करत असतात. त्यामुळं जर तुम्ही मदिराप्राशन करणारच असाल तर आपला तोल कोणत्याही क्षणी जाणार नाही इतक्या बेतानंच करा असा सल्ला मी देईन. आणि दुसरी गोष्ट म्हणजे  आहार मर्यादित ठेवा! 
2. अल्पमुदतीची ध्येये टाळा. 
•  ह्या मुद्द्यातील महत्त्वाचा भाग असा की आपलं दीर्घमुदतीचे ध्येय कोणतं हे माहित असणं. हे जर तुम्हांला माहित असेल तर तुम्ही त्या ध्येयापर्यंतचा मार्ग शोधुन काढण्याची शक्यता बरीच वाढीस लागते. 
3. अपयशासाठी बहाणे शोधणे टाळा. 
• काही विशिष्ट कारणांमुळं मला एखादी गोष्टी शक्य होत नाही असं म्हणू नये. सतत अशी कारणं देत राहिल्यास थोड्याच वेळात लोक त्या कारणांचा संबंध तुमच्या  मर्यादित कुवतीशी लावतात. 
4. ठराविक विचारसरणीचा त्याग.  
• सद्ययुगात तुम्ही सतत नवनवीन गोष्टी करत राहायला हवं. आणि नवनवीन गोष्टी यशस्वीरित्या करायच्या झाल्या तर तुम्हांला नवीन तंत्रांचा वापर करायला शिकायला हवं. आणि नवीन तंत्र शिकायची म्हणजे एका विशिष्ट पद्धतीनं विचार करणं सोडुन देणं ओघानंच आलं. 
5. रामबाण उपाय वगैरे प्रकारांवर विश्वास ठेवू नका. 
• संपूर्ण जगात तुम्ही एकटेच स्मार्ट नाही आहात. त्यामुळे जगात यशस्वी बनायचं असेल तर प्रत्येक दिवशी मेहनत करणं आवश्यकच आहे. एखाद्या मॅजिक स्टिकच्या वापरानं यश तुमच्या पायाशी येईल अशी समजुत सोडून द्या.  
6. परिपूर्णतेचा ध्यास सोडा.  
• एखादी गोष्ट एखाद्या विशिष्ट् मर्यादेपेक्षा परिपूर्ण करण्याचा मोह सोडुन द्या. घरातील सर्व गोष्टी अगदी टापटीप असाव्यात असं वाटणं ठीक पण त्यातील परिपूर्णतेपायी बाकी सर्व गोष्टींचा विसर पडू देणं हे चुकीचंच! 
7.  एका वेळी अनेक गोष्टीवर लक्ष देणं टाळा. 
• एका विशिष्ट् क्षणी / दिवशी / वर्षी आपल्या जीवनात काही मोजक्या गोष्टी / व्यक्ती महत्वाच्या असतात. ह्या गोष्टी / व्यक्ती ओळखता येणं आणि त्यावर लक्ष केंद्रित करणं हे महत्वाचं!
8. सर्व गोष्टींवर नियंत्रण ठेवण्याचा ध्यास सोडा.  
• आपल्या नियंत्रणात केवळ एकच गोष्ट आहे आणि ती म्हणजे आपली मानसिकता! आपली मानसिकता सोडून बाकी सर्व गोष्टी नियंत्रणात आणण्याचा आपण कितीही प्रयत्न केलात तरी त्यावर प्रभाव टाकणारे अन्य घटक असतात आणि ते तुम्हांला निराश करु शकतात.  
9. सर्वांना खुश करण्याचा मोह टाळा. 
• सर्वाना खुश करण्याच्या प्रयत्नात तुमच्या मूळ ध्येयापासून तुमचं लक्ष विचलित होऊ शकतं!
10. नकारात्मक लोकांची संगत शक्य तितकी टाळा.  
• जे लोक आपल्या क्षमतेचा पुरेपूर वापर करुन आयुष्यात प्रगतीपथावर आहेत अशा लोकांची प्रयत्नपूर्वक साथ जोडा. 
11. आपण सर्वांचे आवडते असावं हा विचार डोक्यातुन काढून टाका.
• काहीसा मुद्दा ९ शी संबंधित! लोकांचं आवडतं बनण्याच्या मोहापायी आपण आपल्या मूळ रूपापासून, ध्येयापासुन दूर जातो. 
12. सोशल मीडियावरील आपलं अवलंबित्व सोडा.  
• आपलं आनंदी राहणं आपल्या सोशल मीडियावरील अवताराशी निगडित ठेऊ नका. 

आणि हो यशस्वी बनणं म्हणजे प्रत्येक क्षणी यशस्वी होणं असं नव्हे! यशाच्या  एक क्षणामागं अपयशाची अनेक वर्षे दडली असू शकतात!

(संदर्भ - ही पोस्ट Key to Success ह्या संकेतस्थळावरुन स्फुरण घेऊन लिहिली गेली आहे. )