आपण प्रत्येकजण विविध WhatsApp गटांचे सदस्य असतो. ह्या सहभागामुळं आपल्याला विविध गटांचे गुणधर्म जाणवत असतात. ह्या गुणधर्मांना शब्दरूपात मांडण्याचा आणि २०१७ वर्षासाठी ह्या WhatsApp गटांना उद्दिष्ट नेमून देण्याचा हा प्रयत्न !
एखाद्या WhatsApp गटात पाठविले जाणाऱ्या संदेशांचे ढोबळमानाने खालील प्रकारात वर्गीकरण केलं जाऊ शकतं.
- बौद्धिक चर्चेसंबंधित - ही चर्चा कोणत्याही विषयावर असू शकते जसे की निश्चलनीकरण ते जडेजाच्या गोलंदाजीवर लेग स्लिप लावावी कि नाही ?
- सदस्यांचे स्वतःचे अथवा लग्नाचे वाढदिवस
- दणादण पुढे सरकविलेले (फॉरवर्ड केलेले) संदेश
- सामाजिक जीवनातील खास केंद्रित केलेल्या व्यक्तिमत्वांवरील विनोदाचे संदेश
- कोडी / गाणी
- काहीसा १ शी संबंधित; बौद्धिक चर्चेदरम्यान झालेले मतभेद प्रगल्भतेने मिटवून टाकण्याची एखाद्या गटाची क्षमता!
आता प्रत्येक गटामधील पाठविल्या जाणाऱ्या संदेशांची आकडेवारी गोळा करुन त्याचे विश्लेषण केलं असता असं जाणवेल की प्रत्येक गटात काही विशिष्ट प्रकारच्या संदेशांचे बहुमत आढळून येतं. काही गटात केवळ फॉरवर्ड केलेले मेसेज येतात तर काही गटात नुसते विनोद!
सामाजिक जीवनात कायदा आणि सुव्यवस्था ह्याची जबाबदारी आपल्या डोक्यावर भगवंताने सोपविली आहे असा ठाम समजूत असणारा मी! म्हणून एखाद्या गटात विशिष्ट प्रकारच्या संदेशांचं किती प्रमाण असावं ह्याची काही मार्गदर्शक तत्वे मी जाहीर करत आहे.
- बौद्धिक चर्चेसंबंधित - किमान ४०%
- सदस्यांचे स्वतःचे अथवा लग्नाचे वाढदिवस - कमाल १२%
- दणादण पुढे सरकविलेले (फॉरवर्ड केलेले) संदेश - कमाल १२%
- सामाजिक जीवनातील खास केंद्रित केलेल्या व्यक्तिमत्वांवरील विनोदाचे संदेश - कमाल ७%
- कोडी / गाणी - कमाल १२%
- काहीसा १ शी संबंधित; बौद्धिक चर्चेदरम्यान झालेले मतभेद प्रगल्भतेने मिटवून टाकण्याची एखाद्या गटाची क्षमता! - १५%
प्रत्येक गटाच्या म्होरक्याने (ऍडमिन) प्रत्येक महिन्यात आपल्या गटात आलेल्या संदेशांचे सांख्यिकी वर्गीकरण करुन त्याचा रिपोर्ट प्रसिद्ध करावा. ह्या संख्यात्मक दृष्ट्या केलेल्या विश्लेषणाच्या आधारावर प्रत्येक WhatsApp ग्रुपचे वर्गीकरण केले जाईल जसे की बौद्धिक गट, उत्सवी गट, सरक्या गट (फॉरवर्ड ग्रुप ) वगैरे वगैरे!
त्याचप्रमाणं WhatsApp वर होणाऱ्या प्रत्येक व्यक्तीच्या वागणुकीवरुन त्या / तिलाही WhatsApp व्यक्तिमत्व रिपोर्ट दिला जाईल.
आणि शेवटी ग्रुप आणि व्यक्तिमत्व विश्लेषण आधारावर एखाद्या व्यक्तीला एखादा ग्रुप किती मानवतो अथवा एखाद्या ग्रुपला एखादी व्यक्ती कितपत झेपते ह्याचाही रिपोर्ट उपलब्ध असेल.
एखादी व्यक्ती आपलं मनःस्वास्थ बिघडलं अशी तक्रार घेऊन मानसोपचार तज्ञाकडे गेली तर तिचा WhatsApp compatibility Report पडताळून पाहिला जाईल!
तुम्हांला ही सर्व संकल्पना वेडसर वगैरे वाटण्याची शक्यता आहे. लक्षात ठेवा की जगातील सर्व बुद्धिमान संकल्पनांच्या जनकांना तात्कालीन समाजाने वेड्यातच काढलं होतं.
शेवटी महत्वाचं - ह्या पोस्टद्वारे मी आदित्य पाटील, ह्या संकल्पनेचं पेटंट घेत आहे! ही संकल्पना प्रत्यक्षात आल्यास प्रत्येक रिपोर्टमागे १% फी माझ्या बँक खात्यात जमा करावी .
कोणत्याही टिप्पण्‍या नाहीत:
टिप्पणी पोस्ट करा