RT

दुनियेतील खट्याळ माणसं आपल्यासमोर आली की कसं बरं वाटतं! मस्ती करण्याच्या ज्या काही खुमखुमी आपल्या अंगात सुप्त रूपानं वावरत असतात त्या प्रत्यक्षात कोणीतरी करताना पाहुन धन्य वाटतं. काही खट्याळ माणसांचा खट्याळपणा त्यांनी कितीही प्रयत्न केला तरी त्यांच्या चेहऱ्यावर अगदी स्पष्टपणे उठून दिसतो. ह्या खट्याळपणाला ते स्वतः निरागसपणा म्हणतात. ज्याप्रमाणं लहानपणी निरागस बालक सर्वांचं आवडतं असतं; 

त्याचप्रमाणं आपला हा निरागसपणा आपल्या तरुणपणी सुद्धा आपल्याला तरुणीच्या कंपूत लोकप्रिय बनवत असणार अशी ह्या खट्याळ / निरागस लोकांची मनोमन समजुत / खात्री असते. 

आजच्या पोस्टचा विषय असाच एक निरागस चेहऱ्याचा RT ! 


वरती बसलेला भगवान जसा प्रत्येक माणसाच्या पाप पुण्याचा हिशोब ठेवतो तसाच त्याने व्हाट्सअँप / फेसबुकवर वापरलेल्या शब्दांचा सुद्धा ठेवतो ही RT ची समजुत असावी. त्यामुळं HD म्हणजे हॅपी दिवाळीच्या धर्तीवर HNY, HH, HC, HGP वगैरे शॉर्टफॉर्ममध्ये RT कडून येणाऱ्या मेसेजची आपल्याला सवय करून घ्यावी लागते. अशीच सवय झाल्यावर मग काही दिवसापुर्वी मी उगाचच HGF ची वाट पाहत राहिलो!  

ह्याच शॉर्टफॉर्मवरुन आठवण झाली ती PC ची! साध्या जगात वावरणाऱ्या मला  PC म्हणजे संगणक ह्याच्या पलीकडं काही माहित नव्हतं ! बऱ्याच प्रयासानं PC म्हणजे प्रियांका चोप्रा हे सुद्धा असू शकतं हे माझ्या गळी पाडण्यात सामाजिक मीडियाने हातभार लावला. ह्या धक्क्यातुन मी सावरत नाही तोवर RT साहेब सतत PC PC असा घोष करु लागले. कालांतराने RT हे परिणिती चोप्रा ह्यांचे फॅन असल्याची त्यांनी कबुली दिली. बऱ्याच संशोधनानंतर दोघंही फॅरेक्स बेबी आहेत त्यामुळं ह्या फॅन प्रकरणाच्या मूळ कारणाचा आम्हा सर्वांना साक्षात्कार झाला! 

RT आणि माझी ओळख आमच्या शाळेच्या माजी विद्यार्थी महासंघाच्या कार्यक्रमांच्या माध्यमातुन झाली. तसा आमच्या वयांमध्ये एक तपाहून अधिक फरक! काही वर्षांपूर्वी मी काहीसा कर्मठ वृत्तीचा होतो. नव्या पिढीतील सर्व मंडळी काहीशी भरकटलेली, उथळ असतात असा मी उगाचच समज करुन घेतला होता. पण RT आणि अशा काही मंडळींची माजी विद्यार्थी महासंघाच्या विविध कार्यक्रमातून भेट होत राहिली आणि वयाच्या तिशीला आता पोहोचत आलेली मंडळी योग्य वेळी संयत विचार करतात आणि परंपराचा मान ठेवतात हे जाणवलं आणि आपली संस्कृतीचा वारसा योग्य हाती पडेल ह्याची खात्री झाली. 


RT हा एक वसईतील उभरता, नावाजलेला छायाचित्रकार! ह्यात त्याच्या छायाचित्रण कौशल्याचा वाटा किती आणि त्याच्या उच्चभ्रु कॅमेराचा वाटा किती अशी शंका अरसिक लोक उगाचच व्यक्त करीत राहतात. आपल्या कार्यालयीन जबाबदारीच्या निमित्तानं RT भारतभर भ्रमण करत राहतो. तिथं गेल्यावर तिथली प्रेक्षणीय स्थळं आपल्या कॅमेरात पकडण्याची त्याची खासियत! त्यामुळं आपल्याला भारतभरातील वैविध्यपूर्ण स्थळांचं उत्कृष्ट छायाचित्रण घरबसल्या पाहायला मिळतं! 

राहुलचे fb वर २ हजारहुन जास्त  मित्र! परंतु "FB वर हजारो मित्र आणि रस्त्यावर विचारत नाही कुत्रं!" ह्या परिस्थितीच्या उलटी स्थिती! राहुलला जिवाला जीव देणारे हजारो मित्र वसई आणि देशभर आहेत! आणि हो मी फक्त मित्रांचे बोलतोय! अशाच एका मित्राचं हे मनोगत!

उत्तम छायाचित्रकार म्हणून नाव लौकिक मिळवलेला पण काढलेल्या हजारो फोटो काढताना माझा एकही फोटो न काढणारा *राम** तरीही माझा खास मित्र RT.

त्याची आणि माझी ओळख झाली ती १४ वर्षांपूर्वी कला क्रिडा महोत्सवाचे व्यवस्थापन करताना. तेव्हापासूनच अगदी गुबदुल, हसरा राहुल माझा मित्र झाला तो अगदी जवळचा. वय, शिक्षण, शाळा ते अगदी रहाण्याचे ठिकाण हि आमचे वेगळे आणि दूर. पण म्हणतात ना शैतान नेहमी मैत्री टिकवून असतात. तसे आम्ही कला क्रिडा नंतर देखील नेहमी ओर्कुट, fb किंवा मधेच कधी भेटून टच मध्ये रहायचो.

सकाळी मेसेज नाही म्हणजे राहुल रोमिंगला आहे. आम्ही स्मार्ट आहोतच पण स्मार्ट फोनमुळे जवळीक जास्त होत गेली. fb, wa मुळे मग रोजच टवाळक्या सुरु झाल्या. एखादी related पोस्ट असली कि मग common frd ना tag करून त्यांची खेचायची. त्याहून हि महत्वाचे श्रेयस जोशीच्या कमेंटची मारणे म्हणजे आमचे आद्य कर्तव्य सुरु झाले. 

राहुल आणि माझे जास्त tuning जमण्याचे कारण म्हणजे टवाळकी, मजा मस्करी हे common गुण. आम्ही शांत आणि न हसता कधीही राहू शकत नाही. ३ वर्षापूर्वी आमचा एक whatsapp ग्रुप सुरु झाला. २-३ जण सोडले तर बाकीचे अनोळखी. पण काही दिवसांत आम्ही ग्रुपचे कर्दनकाळ ठरलो. मेंबरची खेचणे, चिडवणे, मुद्दामून भांडण करणे आमचे रोजचे कार्य. कळ केली नाही असा एकही दिवस नाही. या १४ वर्षाच्या मैत्रीत आमचे टायमिंग अगदी अचूक आहे कि, आम्ही एकत्र असलेल्या ४-५ ग्रुप मधला कोणताही ग्रुप असो. आम्ही perfect एकच टार्गेट शोधतो. आणि मग तो पार उखडे पर्यंत आम्ही शांत बसत नाही. सुगंधा ताईना चिडवणे असो किंवा आमचे संतसूर्य संदेश भाऊ असोत. त्यांच्या प्रत्येक सोशल हालचालीवर नजर ठेवून कळ काढण्याची सवय आणि perfect timing कधी चुकले नाही. त्यामुळे कोणत्याही ग्रुप मध्ये काहीही चुकीच घडो पण वाईट आम्हीच. 

एखादा कार्यक्रम याला नको असेल तर मात्र मला सोबत न घेता त्या प्लानची वाट लावण्यात हा माहीर. उगाच वाद, कळ काढत लोकांना भडकवत प्लानची मारण्यात तो मास्टर आहे. “ग्रुप मध्ये चूक असले तरी हार न मानणे हा हि खूप मोठा गुण आहे”

हुशार, नेहमी मदतीला तत्पर हे त्याचे positive गुण.  

 असा हा लोकांना sample वाटून संपल्यावर मग देतो सांगणारा, बर उशिरा देईल ती सुध्दा १५ दिवसांत expire sample देणारा, कुठे बाहेर जाताना मला १०-१५ मिनिट वाट बघायला लावणारा, आणि आजपर्यंत माझा एकही फोटो काढणारया राहुलच्या पुढील वाटचाली साठी लक्ष लक्ष शुभेच्छा.

राहुल तसा धार्मिक देखील त्यामुळं त्यानं वारी केली तेव्हा फारसं कोणाला आश्चर्य वाटलं नाही. त्या वारीच्या वेळेचे त्याने काढलेले काही उत्कृष्ट फोटो !

फॅरेक्स बेबी असला म्हणुन काय झालं, RT फिटनेसच्या बाबतीत कोणतीच हयगय करत नाही. योगा क्लास असले की "मॅट आणायची का?" असले प्रश्न विचारुन तो वातावरणनिर्मिती करतो. काहींना हा "चार आण्याची कोंबडी बारा आण्याचा मसाला !" असला प्रकार वाटतो.  काही वास्तववादी माणसं त्याला "घड्याळात सकाळचे सात वाजलेले कधी पाहिलेत का?" असं विचारुन त्याचा उत्साह खंडित करण्याचा प्रयत्न करतात. परंतु वातावरणनिर्मिती करुन अजुन दोन-चार लोकांना योगा करण्यास प्रवृत्त करावं हाच त्याचा निरागस हेतू असतो. दुर्गम किल्ल्यांवर ट्रेकिंग करणं हा तर RT चा आवडता छंद! इथं पहा ना! त्यानं किती सहजगत्या दुर्गम चढण पार केली आहे! 

ही पोझ  आणि बाळ RT ह्यांच्यामध्ये किती हे साधर्म्य! 

वसईत मराठी भाषेची श्रीमंती जागृत ठेवण्यासाठी विविध माध्यमाद्वारे प्रयत्न केले जातात. वाढदिवस, विशेष परदेशवारी, मोटारगाडी खरेदी अशा खास प्रसंगी एक खास ग्रुप मराठी भाषेतील श्रीमंत विशेषणांचा आणि नवीन टॅग लाईनचा  वापर करुन वातावरणनिर्मिती करतो. ह्यात RT चा मोठा पुढाकार असतो! अशी काही पोस्टर्स! 

आपलं कार्यालयीन काम सांभाळून हे सर्व करायचं म्हणजे उत्साह दांडगा हवा!  RT कडे त्याची काही कमी नाही. "Live life to its fullest" ह्या उक्तीवर RT चा पुर्ण विश्वास! त्यामुळं प्रत्येक ठिकाणच्या केवळ खवैय्यांना ज्ञात असलेल्या उपहारगृहांची त्याला आधीच माहिती असते! त्या त्या ठिकाणच्या चविष्ट व्यंजनांची आपल्याला माहिती होते. घरचा शाकाहारी असलेला RT अधूनमधून नायगाव स्टेशनवरील ताज्या माश्यांची छायाचित्रं FB वर टाकतो आणि वर त्यात केवळ छायाचित्रण अशी कॉमेंट टाकायला विसरत नाही. परंतु RT जवळून माहित असलेली मंडळी मात्र त्या फोटोतील माशाचं सद्यकालीन वास्तव्य कोठे असेल ह्याविषयी निःशंक असतात.  

माजी विद्यार्थी महासंघातर्फे आयोजित करणाऱ्या बॉक्स क्रिकेट स्पर्धेची २००२ बॅच सतत चार वर्षे विजेती! राहुल ह्या संघाचा स्वयंघोषित व्यवस्थापक! ह्यावर्षी त्याला खेळण्याची संधी मिळाली. एक षटक सुद्धा टाकण्यास मिळालं. आपण फलंदाजाच्या दिशेनं सोडलेला हा चेंडू जगातील आतापर्यंतचा सर्वोत्तम फिरकी चेंडू आहे ह्याविषयी १००% खात्री असलेली त्याची ही गंभीर मुद्रा!

पावसाळा आला आणि एका महिन्यात वसईतील विहिरी भरल्या की राहुल आणि मित्रमंडळ आपलं सूर कौशल्य दाखविण्यासाठी वसईतील विहिरी धुंडाळत फिरतं. आपलं हे कौशल्य प्रदर्शित करण्यासाठी ते विहीर मालकांना आपली फी लावत नाहीत हे विहीर मालकांचं सुदैव! अशीच गेल्या पावसाळ्यातील ही एक प्रसन्न मुद्रा! 

अशा छायाचित्रणात उगाचच अमॅझॉन जंगल वगैरे ठिकाणं टॅग करुन निरागस मित्रांना फसविण्यात ह्या मंडळाचा हातखंडा! ह्या मंडळात महर्षी डोंगरे ह्यांचा समावेश आहे. वसईतील सर्वोकृष्ट सुरपटू अशी त्यांची ख्याती आहे! २०२० ऑलिम्पिक खेळात ह्यातील काही मंडळींना सहभागाची संधी मिळो ही शुभेच्छा! ह्या मंडळींना फसविण्यासाठी काही कायम बकरे ./ बकऱ्या लागतात. दिलदार मनाची सुगंधाताई ह्यावेळी स्वतःहुन पुढं होते. फसविले जाण्यात सुद्धा किती धन्यता मिळते हे सुगंधाताईंच्या प्रसन्न मुद्रेवरून सिद्ध होते! 

RT ची गणना FB चं चेक-इन फीचर वापरण्यात आघाडीवर असलेल्या जगातील पहिल्या १० लोकांत होते. ज्या उत्साहानं तो मुंबई विमानतळावर चेक-इन करतो त्याच उत्साहानं पंजाबातील चहाच्या टपरीसुद्धा करतो.  वरती त्यांच्या खास मित्रांनी उल्लेखल्या प्रमाणे एखादा विसरला गेलेला मुद्दा उकरून काढण्यात RT चा हात कोणी धरणार नाही! ह्यासाठी FB वर दोन तीन वर्षापूर्वीची पोस्ट जाऊन लाईक करणे अथवा त्यावर कॉमेंट करणे हे तंत्र मी त्याच्याकडून नव्याने शिकलो! धन्यवाद RT!! 

RT हे एक अष्टपैलू व्यक्तिमत्त्व!  मला त्यातील केवळ मोजके पैलू अनुभवता आले आणि केवळ ह्या मर्यादित माहितीवर ही पोस्ट लिहिली जाऊन  त्याच्या मी न अनुभवलेल्या कळा- गुणांना मला न्याय देता आला नाही ह्याची खंत लागुन राहिली असती.  परंतु निष्काम समाजयोगी / संतसुर्य, महर्षी, अजातशत्रू प्रशांत, सुगंधाताई , विनू  ही वसईतील सामाजिक जीवनातील नामवंत मंडळीनी  आपल्या अमुल्य माहितीभांडारातून बाकीचे सप्तपैलू भरून काढण्यास फार मोठा हातभार लावला, त्याबद्दल त्यांचे मनःपुर्वक आभार! FB वरील बाकीचे २३५६ मित्र आपल्या कॉमेंट्सद्वारा बाकीची माहिती आपणास देतीलच ह्याविषयी मी निःशंक आहे!